ജീവിതസായാഹ്നത്തിലെ നല്ല തോഴര്‍
Posted on: 21 Jul 2012
ജി.എസ്. ഉണ്ണികൃഷ്ണന്‍ നായര്‍
വാര്‍ധക്യകാല ജീവിതം സചേതനമായ ചുറ്റുപാടുകളിലൂടെ ആയാല്‍ ശാരീരികമായ അവശതകളും മനഃസംഘര്‍ഷവുമൊക്കെ ലഘൂകരിക്കപ്പെടും. കൊല്ലത്തെ കിളികൊല്ലൂരുള്ള ഷീലാ ആന്റണി സ്വന്തം ജീവിതത്തിലൂടെ ഈ തത്ത്വം തെളിയിക്കുകയാണ്.
നാട്ടുകാര്‍ ഷീലാമ്മയെന്നു സ്‌നേഹത്തോടെ വിളിക്കുന്ന ഷീലാ ആന്റണി പരമ്പരാഗതമായി കര്‍ഷക കുടുംബാംഗമാണ്. എന്നാല്‍, വിവാഹിതയായതോടെ കിളികൊല്ലൂരില്‍ ഭര്‍ത്താവിനൊപ്പം ബേക്കറി വ്യവസായത്തിലേര്‍പ്പെട്ടു. ഭര്‍ത്താവ് മരിച്ചതോടെ ബേക്കറി വ്യവസായം മകനെ ഏല്പിച്ചു. ശിഷ്ടജീവിതം വളര്‍ത്തുമൃഗങ്ങള്‍ക്കും പക്ഷികള്‍ക്കും സസ്യങ്ങള്‍ക്കുമൊപ്പം മതിയെന്ന ഉറച്ച തീരുമാനമെടുത്തു.
5 ഏക്കര്‍ വ്യാപ്തിയുള്ള കിളികൊല്ലൂരിലെ പറമ്പില്‍ ഷീലാമ്മ തുടങ്ങിയ സംയോജിതകൃഷി ഇപ്പോള്‍ 6 വര്‍ഷം പിന്നിടുന്നു. വളര്‍ത്തുപക്ഷികളില്‍ നാടന്‍കോഴി, താറാവ്, ഗൂസ്, ഗിനി, മണിത്താറാവ് എന്നിവയുണ്ട്. ഇവയൊക്കെ പരമ്പരാഗതരീതിയില്‍ പറമ്പില്‍ തുറന്നുവിട്ടു വളര്‍ത്തുന്നു. വൈകുന്നേരം കൂടണയുംവരെ ഇവ ചിക്കിനടക്കും. 30 ഓളം ഗൂസുകള്‍ കൃഷിത്തോട്ടത്തിലെത്തുന്നവരുടെ പ്രധാന ആകര്‍ഷണമാണ്. ഷീലാമ്മയുടെ അഭിപ്രായത്തില്‍ നല്ല രോഗപ്രതിരോധശേഷിയുള്ള പറവകളാണ് ഗൂസുകള്‍. കുഞ്ഞുങ്ങളെ നന്നായി പരിപാലിക്കുന്ന നല്ല പോറ്റമ്മമാരുമാണ് ഇവ. വര്‍ഷത്തില്‍ 40 മുട്ടകളോളമിടും. ഒരു ഗൂസ് 6 കിലോഗ്രാമോളം ഭാരം വെക്കുന്നു. സദാസമയവും പറമ്പില്‍ ചികഞ്ഞുനടക്കുന്ന ഗിനിക്കോഴികള്‍ 2 കിലോഗ്രാം വരെ ഭാരംവെക്കും. വര്‍ഷത്തില്‍ 30 മുതല്‍ 100 വരെ മുട്ടകളിടുകയും ചെയ്യും. ഗിനിയും ഗൂസും നല്ല കീടഭോജികളുമാണെന്ന് ഷീലാമ്മ സാക്ഷ്യപ്പെടുത്തുന്നു.
50 നാടന്‍ താറാവുകളും 10 മണിത്താറാവുകളുമുണ്ട്. ഇവയ്ക്ക് കുളിക്കാന്‍ വെള്ളം നിറച്ച ടാങ്കുകള്‍ സജ്ജമാണ്. 40 ഓളം നാടന്‍ കോഴികളും പറമ്പില്‍ വളരുന്നു. പറമ്പിലെ തീറ്റയ്ക്കുപുറമേ വളര്‍ത്തുപക്ഷികള്‍ക്ക് ഷീലാമ്മയുടെ വക സ്‌പെഷല്‍ തീറ്റയുമുണ്ട്. ചോറും മഞ്ഞളും നാരങ്ങയും മസാലകളുമൊക്കെ ചേര്‍ത്ത ഈ തീറ്റ ദിവസവും ഒരു തവണ ഷീലാമ്മ നേരിട്ടുതന്നെ നല്കുന്നു. സ്വതന്ത്രമായിവളരുന്ന വളര്‍ത്തുപക്ഷികള്‍ക്ക് രോഗബാധ കുറവാണെന്നും ഇവയിടുന്ന മുട്ടകള്‍ തികച്ചും ജൈവമാണെന്നും ഷീലാമ്മ പറഞ്ഞു. അതിനാല്‍ ഇവിടത്തെ മുട്ടയ്ക്ക് നാട്ടില്‍ നല്ല പ്രിയംതന്നെയുണ്ട്.
ആടുകള്‍ക്കും പശുക്കള്‍ക്കും പറമ്പിലെ പുല്‍മേട്ടില്‍ നിര്‍ബാധം മേഞ്ഞുനടക്കാം. കറവയുള്ള നാലെണ്ണമുള്‍പ്പെടെ പത്തുപശുക്കളുണ്ട്, 15 ആടുകളും. പച്ചപ്പുല്ല് ധാരാളം തിന്നുന്നതിനാലും കൃത്രിമത്തീറ്റ അധികം നല്കാത്തതിനാലും മൃഗപരിപാലനം ലാഭകരമായി മുന്നേറുന്നു. ഇവയുടെ പാലിനായും കുട്ടികളെ വാങ്ങാനും നാട്ടുകാരെത്തുന്നുണ്ട്.
വൈവിധ്യമാര്‍ന്ന പരമാവധി വിളകള്‍ വളര്‍ത്തുകയെന്നതാണ് കൃഷിയെ സംബന്ധിച്ച് ഷീലാമ്മയുടെ കാഴ്ചപ്പാട്. പലയിനം മാവ്, നെല്ലി, ചെറി, അത്തി, സപ്പോട്ട, കൈതച്ചക്ക തുടങ്ങിയ ഫലസസ്യങ്ങളും അശോകവും വേങ്ങയും പോലുള്ള ഔഷധവൃക്ഷങ്ങളും പലയിനം ഔഷധസസ്യങ്ങളുമൊക്കെ പറമ്പിലുണ്ട്. സ്പ്രിങ്‌ളര്‍ നനയാണ് ഇവയ്ക്ക് അനുവര്‍ത്തിക്കുക. മൃഗങ്ങളുടെയും പക്ഷികളുടെയും കാഷ്ഠം വളമായി നല്കുന്നു.
''ഇതു വളരെ ലാഭകരമായ സംരംഭംതന്നെയാണ്, അതിലുപരി ആരോഗ്യകരവും ആനന്ദകരവും''-ഷീലാമ്മ വ്യക്തമാക്കി. ഷീലാമ്മയുടെ വാഹനം കൃഷിയിടത്തിലെത്തുമ്പോള്‍ ആഹ്ലാദവുമായി ഓടിയെത്തുന്ന വളര്‍ത്തുപക്ഷികളെ കാണുമ്പോള്‍ ഇവര്‍ തമ്മിലുള്ള ആത്മബന്ധം ബോധ്യപ്പെടും. യാന്ത്രികയുഗത്തില്‍ വിളപരിപാലനവും മൃഗപരിപാനവും ആരോഗ്യകരമായ ജീവിതത്തിനുള്ള ഒറ്റമൂലിതന്നെയാണ്.
കാര്‍പ്പ് മത്സ്യങ്ങളിലധിഷ്ഠിതമായ ശുദ്ധജലമത്സ്യകൃഷിയില്‍ താത്പര്യമില്ലാത്ത കര്‍ഷകര്‍ക്കിതാ മറ്റൊരു മത്സ്യം -'പന്‍ഗേഷ്യസ്' എന്ന ശാസ്ത്രനാമത്തില്‍ അറിയപ്പെടുന്ന അസംവാള. നാലടിയോളം നീളവും 44 കി.ഗ്രാമിന് മുകളില്‍ വളര്‍ച്ചയുമെത്തുന്ന ഈ മത്സ്യം ജലകൃഷിമേഖലയ്ക്ക് പുതുജീവന്‍ നല്‍കുമെന്നതില്‍ സംശയമില്ല.
വീടുകള്‍, വിശ്രമമന്ദിരങ്ങള്‍, ഭോജനശാലകള്‍, പാര്‍ക്കുകള്‍, എക്‌സിബിഷന്‍ സ്റ്റാളുകള്‍, ഹോട്ടല്‍ മുറികള്‍ (Foyers), ബോട്ടുജട്ടി, ഏറോഡ്രോം ലോഞ്ചുകള്‍ - എന്നുവേണ്ട, ആശുപത്രികളില്‍ പോലും സ്വാഭാവിക പരിസ്ഥിതിയുടെ ഒരു ഖണ്ഡം പുനഃസൃഷ്ടിക്കപ്പെട്ട കണ്ണാടിക്കൂടുകളില്‍ ചടുലതയോടെ നീന്തിത്തുടിക്കുന്ന, വര്‍ണ്ണമത്സ്യങ്ങളുടെ കാഴ്ച ചേതോഹരം തന്നെയാണ്! മറ്റ് പക്ഷിമൃഗാദികളേക്കാള്‍ മനുഷ്യനെ ഹഠാദാകര്‍ഷിക്കുന്നവയത്രേ അലങ്കാരമത്സ്യങ്ങള്‍; അവയേക്കാള്‍ മലിനീകരണം കുറഞ്ഞവയും അലങ്കാരമത്സ്യങ്ങള്‍തന്നെ; വിശിഷ്യാ, ശബ്ദശല്യം! അവ വര്‍ണശബളവും നയനാഭിരാമവുമാണ്; ആകയാല്‍, അലങ്കാരമത്സ്യപരിപാലനം എന്ന വിനോദം - കല-ശാസ്ത്രം ഇന്ന് മുന്‍പന്തിയിലാണ്. ഫോട്ടോഗ്രാഫി കഴിഞ്ഞാല്‍, ഏറ്റവുമധികം ആളുകളുടെ പ്രധാനപ്പെട്ട വിശ്രമസമയ വിനോദം (Hobby) അക്വേറിയം മത്സ്യപരിപാലനമാണ്.
മത്സ്യത്തെ ബന്ധനത്തില്‍ വളര്‍ത്തുക എന്നത് പ്രാചീനകാലം മുതലുള്ള ഒരു പരിപാടിയാണ്. ക്രിസ്തുവിന് രണ്ട്-നാല് സഹസ്രാബ്ദങ്ങള്‍ക്ക് മുന്‍പ് മുതല്‍; ശരിയായി പറഞ്ഞാല്‍ ബി.സി. 4000നും 2000നും ഇടയില്‍, സുമേറിയക്കാരാണ് മത്സ്യങ്ങളെ ഭക്ഷ്യോപയോഗത്തിനായി കുളങ്ങളില്‍ സൂക്ഷിക്കുവാന്‍ തുടങ്ങിയത്. കുളങ്ങളില്‍ മത്സ്യങ്ങളെ സൂക്ഷിച്ചിരുന്നതായുള്ള ചിത്രങ്ങള്‍ പ്രാചീന ഈജിപ്റ്റില്‍ നിന്നും കണ്ടുകിട്ടിയിട്ടുള്ളതിനാല്‍, ഈജിപ്റ്റുകാര്‍ക്കും മത്സ്യപരിപാലനം വശമായിരുന്നു എന്നുവേണം കരുതാന്‍. കൂടാതെ, അവര്‍ മത്സ്യങ്ങളെ വിശിഷ്ടവും പരിപാവനവുമായി കണക്കാക്കുകയും, ആകയാല്‍ അവയെ ഭക്ഷിക്കുന്നത് പാപമാണെന്ന് വിശ്വസിക്കുകയും ചെയ്തിരുന്നു!
എ.ഡി. 1136-ല്‍ ഹിയാസുങ് (Hian Tsung) ചക്രവര്‍ത്തിയുടെ കാലത്താണ് അലങ്കാര മത്സ്യപ്രജനനങ്ങള്‍ നടത്തിയതെങ്കിലും ചൈനക്കാര്‍ ഈ രഹസ്യം അതീവ ഗോപ്യമാക്കി വെച്ചു. 1,500-ല്‍ ആണ് ജപ്പാന്‍കാര്‍ അലങ്കാര മത്സ്യപരിപാലനം ഒരു വിനോദമായി അംഗീകരിച്ചത്; തുടര്‍ന്ന് അലങ്കാര മത്സ്യ പ്രജനന വിദ്യ സ്വയം ആര്‍ജിക്കുകയും ചെയ്തു.
ഇന്ത്യയില്‍ കുറേക്കൂടി താമസിച്ചാണ് പൊതുഅക്വേറിയങ്ങള്‍ സ്ഥാപിതമായത്. രാജ്യത്തെ രണ്ടാമത്തേത് തിരുവനന്തപുരത്ത് ശംഖുമുഖം കടപ്പുറത്ത് 1938-ല്‍ തിരുവിതാംകൂര്‍ മഹാരാജാവ് സ്ഥാപിച്ച ലവണജല അക്വേറിയം ആയിരുന്നു. (അത് കുറേ നാളായി പൂട്ടിക്കിടക്കുന്നു! അത് പൊതുജനങ്ങള്‍ക്ക് തുറന്നുകൊടുക്കാനോ, മറ്റൊന്ന് സ്ഥാപിക്കാനോ നമുക്ക് സാധിക്കുന്നില്ല - അതിലും വലിയ എത്രയെത്ര കാര്യങ്ങളാണ് നമുക്ക് ശ്രദ്ധിക്കേണ്ടത്! സംസ്ഥാനത്തില്‍ പൊതുജനോപകാരപ്രദമായ സ്ഥാപനങ്ങള്‍ പലതും ജനാധിപത്യയുഗത്തിലല്ല ഉണ്ടായത് എന്നത് അത്ഭുതംതന്നെ! ഉദാ: നക്ഷത്രബംഗ്ലാവ്, കാഴ്ചബംഗ്ലാവ്, മൃഗശാല, വാട്ടര്‍ വര്‍ക്‌സ്, യൂണിവേഴ്‌സിറ്റി കോളേജ്, ആദ്യ നിയമസഭാമന്ദിരം...!)
പാത്രങ്ങളുടെ അസൗകര്യം ഒരു പ്രശ്‌നം തന്നെയായിരുന്നു. പിന്നീട് ജല- സസ്യ-ജന്തുജാലങ്ങളെ പ്രദര്‍ശിപ്പിക്കുന്നതിന് കുറേക്കൂടി സൗകര്യപ്രദമായി ചില്ലുപാത്രങ്ങള്‍ ഉണ്ടായി. തുടര്‍ന്ന് ഗ്ലാസ് ടാങ്കുകളില്‍ വെള്ളം നിറച്ച് മത്സ്യങ്ങളെ പരിപാലിക്കുന്ന അക്വേറിയങ്ങള്‍ ഉണ്ടായി (അക്വാ=ജലം). അപ്പോള്‍ ഉള്ളിലുള്ള മത്സ്യങ്ങളെ മുകളില്‍ നിന്നും വശങ്ങളില്‍ നിന്നും കാണാമെന്നായി; എന്നുതന്നെയല്ല, അവയ്‌ക്കൊരു ത്രിമാനതയും ലഭിച്ചു.
ഇന്ത്യന്‍ ശുദ്ധജലാശയങ്ങളിലെ രാജാവെന്ന് പേരുകേട്ട കുയില്‍ മീനിന്റെ (മഹസീര്‍) സംരക്ഷണത്തിനായി കേരള ഫിഷറീസ് സമുദ്ര പഠന സര്‍വകലാശാലയുടെ കീഴിലുള്ള പുതുവൈപ്പ് ഫിഷറീസ് സ്റ്റേഷന്‍ വിപുലമായ പദ്ധതി തയ്യാറാക്കുന്നു. തീന്‍മേശയിലെ വിഭവം എന്നതിനപ്പുറം ചൂണ്ടയിടല്‍ വിനോദോപാധിയായവരുടെ പ്രിയപ്പെട്ട മത്സ്യമാണിത് ( സ്‌പോര്‍ട്ട്‌സ് ഫിഷ് ) . ചില പ്രദേശങ്ങളില്‍ പുണ്യമത്സ്യമായാണ് ഇവയെ കരുതുന്നത്.
കൊച്ചി: തിമിര്‍ത്തു പെയ്ത മഴ... അതിനിടയില്‍ കിട്ടിയ, മഴയൊഴിഞ്ഞ ഒരിടവേള... മേഘങ്ങള്‍ കനിഞ്ഞു നല്‍കിയ ഈ അന്തരീക്ഷത്തിലാണ് ഞാറയ്ക്കലിലെ മത്സ്യഫാമിലേക്കുള്ള യാത്ര. കലിതുള്ളി മദിച്ചുനിന്ന അറബിക്കടലിന് മുന്നില്‍ അനുസരണയുള്ള ഒരു കൊച്ചുകുട്ടിയെ പോലെ ശാന്തമായിരുന്നു ഈ ഫാം. വാഹനം നിര്‍ത്തി ഫാമിലേക്കുള്ള, ചുണ്ടന്‍വള്ളത്തിന്റെ മാതൃകയില്‍ നിര്‍മിച്ച കൊച്ചുപാലം കടക്കുമ്പോള്‍ താഴെ ഒരുപറ്റം കരിമീനുകള്‍ അതിഥികളെ വരവേല്‍ക്കാനായി ചുണ്ട് കൂര്‍പ്പിച്ച് വെള്ളത്തിന് മുകളിലേക്കുയര്‍ന്നു. നൂറുകണക്കിന് പൊടിക്കുഞ്ഞുങ്ങള്‍ കൂടി വരി വരിയായി അവയ്‌ക്കൊപ്പം അണിചേര്‍ന്നു.
നഗരത്തിന്റെ വന്‍ വികസനത്തിന്റെ ഭാഗമായി തിരക്കിനൊപ്പം ഓടിത്തളരുമ്പോള്‍ മനസ്സ് റിഫ്രെഷ് യ്ത്ത ചെയ്യാന്‍ പ്രകൃതിയോട് ഇണങ്ങിച്ചേര്‍ന്നു നില്‍ക്കുന്ന ഇവിടേക്ക് ദിനംപ്രതി എത്തുന്നവരുടെ എണ്ണം വര്‍ദ്ധിച്ചുവരികയാണ്. ആഴ്ചതോറുമുള്ള യാത്രകള്‍ക്ക് പുതുസ്ഥലം തേടുന്ന കൊച്ചിയിലെ ഐ.ടി. പ്രൊഫഷണലുകള്‍ക്കും ടെന്‍ഷന്‍ ഇറക്കിവയ്ക്കാന്‍ പറ്റിയ തുരുത്തായി ഫാം ഇന്ന് മാറിക്കഴിഞ്ഞു. വിശാലമായ മീന്‍പാടത്തുകൂടിയുള്ള ബോട്ടുയാത്രയാണ് ഇവിടത്തെ ആകര്‍ഷണം. രണ്ടുപേര്‍ക്ക് കയറാവുന്ന പെഡസ്റ്റല്‍ ബോട്ടുകളും നിരവധി തുഴബോട്ടുകളുമാണ് സഞ്ചാരികള്‍ക്കായി ഇവിടുള്ളത്. പൂമീനുകള്‍ ഉയര്‍ന്നുചാടുന്ന മീന്‍ കെട്ടിലൂടെ അരമണിക്കൂര്‍ നീളുന്ന ബോട്ടുയാത്രയ്ക്കിടയില്‍ സഞ്ചാരികള്‍ക്ക് വിശ്രമിക്കാനായി ചെറു മാടങ്ങളും നിര്‍മിച്ചിട്ടുണ്ട്. വെള്ളത്തിന് നടുവില്‍ അങ്ങിങ്ങായി ഉള്ള മൂന്ന് ഏറുമാടങ്ങിലേക്ക് വഞ്ചി തുഴഞ്ഞ് എത്തി, കണ്ടല്‍ക്കാടിന്റെ തണലും തണുപ്പും ആസ്വദിക്കാം.
തൃശ്ശൂര്‍:പറപ്പൂക്കര പഞ്ചായത്തിലെ തൊട്ടിപ്പാള്‍ പള്ളം പാടത്ത് രണ്ട് ചെറുപ്പക്കാര്‍ മീന്‍ വളര്‍ത്തുന്നു എന്നു കേട്ടപ്പോള്‍ നാട്ടുകാര്‍ക്ക് അതിലത്ര അദ്ഭുതം തോന്നിയില്ല. നാട്ടില്‍ ദിനംപ്രതി എന്തെല്ലാം സംരംഭങ്ങള്‍ വരുന്നു, അതിലെത്ര നിലനില്‍ക്കുന്നു. എന്നാല്‍ പാഴായി തോപ്പില്‍ രാമചന്ദ്രന്റെ മകന്‍ സുബിന്‍, സുഹൃത്ത് പള്ളം ആറ്റപ്പറമ്പില്‍ ശശിയുടെ മകന്‍ ശരത് എന്നീ 23 വയസ്സുകാര്‍ മത്സ്യകൃഷി എന്ന ഉറച്ച തീരുമാനത്തിലായിരുന്നു.
കോട്ടയം:പാല്‍ തരുവോളം മാത്രം പശുവിനെ സ്‌നേഹിക്കുന്നവര്‍ക്കിടയില്‍നിന്ന് ഇവര്‍ വഴിമാറി നടക്കുകയാണ്. കറവവറ്റിയ പശുവിനും സ്‌നേഹം ചുരത്തി വാഴൂര്‍ തീര്‍ഥപാദാശ്രമം കരുണയുടെ കാവലാളാകുന്നു. പശുക്കള്‍ ഇവിടെ ഗോമാതാക്കളാണ്. പാല്‍വറ്റിയ കാലികള്‍ ഇവിടെ നിന്ന് അറവുശാലയിലേക്ക് പോകുന്നില്ല. പകരം കരുതലിന്റെ വാര്‍ധക്യം അവരെ കാത്തിരിക്കുന്നു.
